Beled-xaawo{RBC Radio} Ciidamada dowladda Ethiopia ee ku sugan gobolka Gedo ee dalka Soomaaliya ayaa waxa ay ku dhawaaqeen iney la wareegeen sugidda amniga gobolkaas shir Jaraa’id oo maanta ay magaalada Beled-xaawo ku qabteen masuuliyiinta maamulka gobolkaas, culima udiinka ahlu sunna iyo saraakiisha ciidanka Ethiopia ayaa waxaa lagu shaaciyey in xaqiijinta nabadgalyada gobolkaas ay la wareegeen ciidanka Ethiopia.
Sida aan wararka ku heleyno sarkaal sare oo ka tirsan ciidanka Ethiopia oo ka hadlay Shirkaasi Jaraa’id ayaa waxa uu sheegay in ciidankoodu ay si buuxda ula wareegeen xaqiijinta amniga gobolka Gedo,wuxuuna tilmaamay in ciidamada dowladda ee ay iyadu soo tababartay ay kala shaqayn doonaan sugidda amniga.
Saraakiisha ciidanka Ethiopia ayaa sheegay in dhammaan ciidamada dowladda laga saari doono magaalooyinka,waxayna sheegeen in loo diri doono hawlgallo sida ay hadalka u dhigeen,amniga gudaha degmooyina gobolka Gedo ayaa waxaa si toos ah ula wareegay ciidanka Ethiopia ee ku sugan gobolkaas.
Saraakiisha Ethiopia ee maanta ka hadlay magaalada Beled-xaawo ayaa waxa ay maamulka iyo shacabka degmooyinka gobolkaas ugu baaqeen iney keenaan ciidamo madani ah oo ciidankooda kala shaqeeya amniga gudaha magaalooyinka gobolka Gedo.
Tallaabada ay qaadeen saraakiisha ciidamada dalka aan deriska nahay ee Ethiopia ee ay ku sheegeen iney gabi ahaanba kula wareegeen xaqiijinta amniga gobolka Gedo ayeysan wax war ah kasoo saarin dowladda federaalka Soomaaliya.
RBC Radio
Xafiiiska Muqdisho
No comments:
Post a Comment